АЛЫС АЛЫСЛАРҒА КЕТКИМ            КЕЛЕДИ…

АЛЫС АЛЫСЛАРҒА КЕТКИМ            КЕЛЕДИ…

АЛЫС АЛЫСЛАРҒА КЕТКИМ
           КЕЛЕДИ…

Дым шексиз қыяллар жүректи езип,
Наҳақлықтан кеткен кеўилим безип.
Пүткил дуньяны ҳеш қалдырмай гезип,
Aлыс алысларға кетким келеди.

Өмир қыйнар табасында қуўырып,
Ойнар және самалына суўырып.
Ҳалымның барынша қатты жуўырып,
Тезирек мақсетке жетким келеди.

Қырмызы гүллерден гүл дәсте түйип,
Жемистиң барлығын алдыңа үйип.
Жаным атам, анам жүзиңнен сүйип,
Қатты баўырыма басқым келеди.

Қыялымды тартып өзине суўлар,
Мәкән етип үйрек шағала қуўлар.
Бир нәрсени аңсап сағынып туўлар,
Теңиз яңлы толып тасқым келеди.

Айтқанларым болмағанша қоймаған,
Еркелетсе еркеленип тоймаған.
Қумардан шыққанша шалқып ойнаған,
Бийғам балалыққа қайтқым келеди.

Сүйген жүректи сүймегенге сыйламай,
Сезимлерди сыр деп ишке жыйнамай.
Сени де… өзимди бунша қыйнамай,
Жаным сүйемен деп айтқым келеди.

Дәртлер шымшылайды тағыда осып,
Нийетке жеткизбей жолымды тосып.
Сабырыма және сабырлар қосып,
Алға қарай қәдем атқым келеди.

Қыйын екен шертиў өмирдиң тарын,
Қушақлайын кел қәдирли ем дәрим.
Ана шаршадым умытайын бәрин,
Аяғыңда бираз жатқым келеди.

Қыйнама өзиңди мийли мени ур,
Жеңилме өмирге болды қәне тур.
Қолыңды бер маған, кеттик жаным жүр,
Сени де бахытлы етким келеди.

Болды жыламайман өзимди езип,
Өмирди тағыда тереңлеў сезип.
Пүткил дуньяны ҳеш қалдырмай гезип,
Алыс алысларға кетким келеди.

✍️AЛЛАНАЗАРОВА НИЛУФАР