28Apr-2025
Ózbekstan kitapqumarlar eli kitapqumarlıq hápteligi 2025
Ózbekstan kitapqumarlar eli kitapqumarlıq hápteligi 2025
Ózbekstan Respublikası Ministrler Keńesiniń «2020-2025- jıllarda kitapqumarlıq mádeniyatın rawajlandırıw hám qollap-quwatlaw milliy dástúri tiykarında «Ózbekstan kitapqumarlar eli» súreni astında V Respublika Kitapqumarlıq hápteligi shólkemlestirildi. Hápte dawamında jaslardıń kitap oqıwǵa bolǵan qızıǵıwshılıǵın arttırıw, máhálleler arasında ádebiy kórkem shıǵarmalardı keńinen násiyatlaw, watan súyiwshilik, insaniylıq hám óz ara mexir miriwbet sezimlerin oyatıw, ruwhıy hám mádeniy bilim beriw maqsetinde hápte dawamında ushırasıwlar, intelektual soraw-juwap oyınları, sáwbetlesiw hám ádebiy kesheler, kóshpeli ilájlar shólkemlestirildi. Búgin hápteliktiń «Kitapxana sırlı álem ǵáziynesi» atamasında juwmaqlawshı ilajı bolıp ótti. Ilájǵa Respublika ruwxıy hám aǵartıwshılıq orayı Moynaq rayonı bólimi bas qánigesi A.Jiemuratova, mektep kitapxanashıları oqıwshı jaslar, belsendi kitapqumarlar hám keń jámiyetshilik wákilleri qatnastı. Ilájdı Málimleme-kitapxana orayı direktorı A.Embergenova ashıp berdi. Ol óz sózinde búgingi bayram menen bársheni qutlıqlap, kitap insan ómirinde úlken orın tutatuǵınlıǵın, kitap penen dos bolǵan hár bir insan joqarı nátiyjelerge erisetuǵınlıǵı, kitap oqıǵan insannıń til baylıǵı artıp, sana-sezimi rawajlanatuǵınlıǵın aytıp ótti hám keshe miymanları, qatnasıwshılarına áwmetler,tabıslar tilep qaldı. Sózge shıqqanlar kitaptıń áhmiyeti, paydası, insan ómirinde tutqan ornı haqqında jaqsı pikirlerin bildirip ótti. Keshe dóretiwshi oqıwshılardıń tayarlap kelgen koncert baǵdarlaması menen dawam etti hám belsendi kitapqumarlar tárepinen “Perzentime kitap sawģa etemen” aksiyası tiykarında kitapxanaģa kórkem ádebiy kitaplar sawģa etildi Sońında “Ózbekstan kitapqumarlar eli” súreni astında V Respublika “Kitapqumarlıq hápteligi” sheńberinde bir hápte dawamında ótkerilgen ilájlarǵa belsene qatnasqanlar “Húrmet jarlıqları” menen sıylıqlandı.
 |
 |
 |